Act 24 | ASO | STEP | Gamene faef (5) ogo vavo eveneto' medelo mino O'moso inite' lehize-daa' ive naba Ananiakisi ido' mono' gizebo ve linge masi ido' goni' gamazi lo monovo gelaa' ive ma gulive Telitulokisi ingine Kaesalea ebeta limani'. Limi Paulongumu' goni' gamazi lilisa ngamani naba Heliki' neida dizani'.

Acts 24

Zuda Veliti Gizebo Ve'ine Naba Nene Paulo'ni Goni' I-dani' Gamazi

1 Gamene faef (5) ogo vavo eveneto' medelo mino O'moso inite' lehize-daa' ive naba Ananiakisi ido' mono' gizebo ve linge masi ido' goni' gamazi lo monovo gelaa' ive ma gulive Telitulokisi ingine Kaesalea ebeta limani'. Limi Paulongumu' goni' gamazi lilisa ngamani naba Heliki' neida dizani'. 2 Dizikevo ngamani naba aza asi lavo Paulo' ogavo Telitulo' aza Paulo'ni goni' o-delesa ti' lo line': Helikizo, gaza ve naba make, gaka gele veveso gaza lele'mize lamine' ogo leze misubouko inite' mata' mine gopo ine' nene do vevesanivo laza lamine' hongu lo minaa' noune' ma nenako numudo' namado' ve muki' isaa' neve lo gamene gamene gopo'ni laa' noune. 4 Gamazi ha'na loloni' gosele' gebelalize. Nemu' ahovo ngomo ma lo-gemeloni' nene gei' nasahilikamu' ogo gele nemeline. 5 A'mine ve mene monovo goloso oga' ive mino misubou' misubou' mono Zuda ve mukiliti mulu'ningu' hizo lovo hizilizangumu' do avito' molo-ngedaa' neive. Ne'mine ogo Nasalete ve'mi mono' laa' aveti ve naba'ine ma neive. 6 Aza nene leze mono' numude naba do gopo olosa neivo analo' dune' ve. [Laza leli' loutelo' do molo goni' o-delone lo gilune'za 7 amiliti ve naba'ine Lisia' ogo lavo amilite amuzo mili adeuti' ipe' igi dani' ve. 8 Ne'mine ikevo a'mine goni' i-dilizave geito' igi goni' i-dilizave lo Lisia' lo-ngimine'.] Gasika gonito' ele'mize nomulune' gamazimu' monovo've vise' ogo longo' o-do monovo've do soto' molalosane. 9 Ne'mine lo lavo Zuda ve gamazi'velo' ledeni igi hizi ele' i-dani'.

Paulo' Aza Heliki' Velelo' Eze Monovo Lo-ngimine' Gamazi

10 Ne'mine ikevo ngamani naba aza Paulo'ni gamazi lilive lo ana hisu' o-davo Paulo' ti' lo line': Kilisimasi muki' ogo novingu' nene gaza evene' zuho mene gizebo o-ledo goni' gamazi geleka' geleka' ogo nane' nenako leli' monovotemu' nene mo gele lamine' o nolosane lo gelo a'mine goni' i-nidani' gamazilo' do velepe' izo gamazi'ne lu'ne lapa nomine' mino ha lolosuve. 11 Naza Zelusalemi numuda O'moso opo'ni lo-emelesa dizo minuvodoti' gamene ma ogo vine' nene gamene tuveluvo' (12) ogo vavo none. Nemu' nene gasika evene' longo' o-ngedeline' nene li-gimikevo ha gelelesane. 12 Naza nene mono' numuno nabau' ido' mono' numuno ngomo ngomou' ido' heta numuno ebeku' evene' masi monokumu' gamazitunu' lovo ogo eza ema nonivo ido' evene' do nubuho o-ngedo mulu'ningu' nohizuvo ningisa'mani' ve. 13 Ido' ingine nenikumu' lihime ne'mine ne'mine ogo dani' ve li nilani' gamazimu' gelanivo gihile izeleseive li gelebizilisa ilizani' nene ngeli gelebizamilisave. 14 Ne neine'za gamazi li'mi vani' mauti' hamo' lamine' ma lani' lo soto' ogo lo-gemelove. Mono' aka gosohokumu' angise'ine evene' ize' molo do gopo o-ngedaa' aka ve lani' nene a'mine akalo' nomono naza avotemote opo'ni li gelekele' i-dani' O'moso nene opo'ni lo gelekele' o-daa' nouve. Ne'mine ogo naza Mose' lo huko line' gamazisi ido' O'moso'mi gamazi li soto' ave polohetelite gizikani' gamazi nesi muki' gamazimu' nene gele ele'vole' o nouve. 15 Ido' ingine gilani' evene' goloso lamine' hele noloninguti' otaa' nene aliteleseive li gili nizani' nene nazasi a'mine'mine ogo gele lamine' o nouve. 16 Ido' O'moso'mo ningavo ido' evene' ningikevo neze lu'ne gamene gamene laminekovo' veveso minelive lo neze monovo'nelo' gizebo laminekovo' ogo minaa' nouve.

17 Ido' naza misubo mala vo nomonuvo kilisimasi linge ma ogo vavo a'mine monuvodaati' alevelite di nubo ani' moni nene do ogo neze zuho Zuda ve engiku' goho' gahali' minani' nene di ngimilizave lo lehize-ngedelesa ido' O'moso opo'ni lo inite' ma lehize-delesa Zelusalemi numuno ebeta vuvoni' ve. 18 A'mida nene oko'ne lu'ne do lamine' ogosa mono' numuno nabau' dizo a'mine luvoni' gono nene noduvo ningani' ve. Ido' ningani' nene naza evene' vai' do nubo amo ido' gani mangilise do soto' amo haza nouvo ningani' ve. 19 Ne neiha Asia misuboukoti' Zuda ve linge ma a'mida mini gopo gamazi lani'. A'mine ve nete nenikumu' lihime di minani' noline' nene gei' vekalo' mene mini goni' i-nidilizanako amave. 20 Ido' a'mine ve nete goni' i-nidamilizani' noline' nene a'mine idise mela nizavete goni' i-nidi naza engi' kanisoleti muliseu' nouvo neni' lihime ningi nilizani' nene mo li soto' ilizado' o neive. 21 Gamazi hamo' gehepeve ma noloseive. Naza gomuta vomine vovo'ningu' mino asi naba lo ti' lo lo-ngimuvoni': Helakuti' otaa' nene neive lo gele ele'vole' o nouvongumu' lingine gonito' nele'mizi nimilavo idi'nise nouve lo lo-ngimuvoni' ve.

Paulo' Aza Nala' Numungu' Gohi Minine' Gamazi

22 Ne'mine lo lavo Heliki' aza mono' aka gosohokumu' gele hehe laa' ive mino gamazi olihe di hilamavo lumo haza molokivo minine'. Ne'mine ogo ne'minevo' ma lo-ngimine': Amiliti guve'inesi ve Lisia' lemo ogavo gei' goni' gohi gelo do helelove. 23 Ne'mine lo lo-emo amiliti gizebo ve ti' lo lo-imine': Lingine Paulo'ni gizebo i-di ne'mine mana'mine i-dami zogo ve zuholite igi na'na' i-dilisa nilavo ma ha gili ngimilo.

24 Gono gamazi ti' lo lo-emo gamene ma nomino Heliki' aza elenaho Zuda vene' gulive Dulusila'ni nene ele'mizo dize mino Paulo'ni asi lo-emavo aza ogo Izesu' Kilisito'nimu' gele ele'vole' oga' monovomu' lo-ngimine'. 25 Inite' lamine' vevese mininekovo' ogo molo oga' nemu' ido' lute do gili' lo lisihe' minaakumu' ido' gamene nabalo' O'moso'mo goni' o-ledeline' nemu' lo-ngemavo Heliki' aza ehelele izavo ti' lo lo-imine': Idi'nise moda ve. Vo minelinize. Vo nanivo alinge' gezemu' geleloni' gamene alitavo ma asi lokuvo aline. 26 Heliki' aza Paulo' gamazi've lanite' ngomo giliha ido' a'mingu' nene Paulo' ne'mo a'mine veli'mo kuluhize-nedelingumu' ve lo moni nemelihe lo gelo gamene gamene asi lo-emavo oga' ivo gamazi li volelo' melo' igi minaa' asine'.

27 Ne'mine igi nizasivo kilisimasi seta' ogo vavo ngamani naba gohi ma gulive Polikio' Hesito' aza ogo Heliki' mo'mosi've dani'. Ne'mine neivo Heliki' aza Zuda ve nezemu' gilavo lamine' ilive lo Paulo'ni kuluhize-damo haza nala' numungu' miningu' hulomiko vavo minine'.